വിവേകശൂന്യതയുടെ പരിണാമസിദ്ധാന്തം!
പൊതു നിരത്തുകളിലെ മാലിന്യനിക്ഷേപം മാത്രമല്ല, ഇന്നു തെരുവിലരങ്ങേറുന്ന എല്ലാത്തരം സംസ്കാരശൂന്യമായ പ്രവൃത്തികളും പുതിയ നിയമ നിര്മാണം വഴി നിരോധിക്കപ്പെടേണ്ട ഒരവസ്ഥാ വിശേഷമാണ് നിലവിലുള്ളത്. സംസ്കാരം പ്രതിസന്ധി നേരിടുന്ന ഈ കാലഘട്ടത്തില് ഇത്തരം നിയമങ്ങള്ക്കു പ്രസക്തിയേറെയാണ് അതുകൊണ്ടുതന്നെ സ്വാഗതാര്ഹവും -- സുബുദ്ധിയില്ലാത്ത ഒരു ജനതയാണ് നാം എന്ന് ലോകത്തിനുമുന്നില് വിളമ്പരം ചെയ്യുന്നതിന് തുല്യമാണ് സര്ക്കാരിന്റെ ഇത്തരം വിജ്ഞാപനങ്ങളെന്ന് ചിലരെങ്കിലും വിലയിരുത്തുന്നുണ്ടാവും!
സംസ്കൃതിയുടെ ഈറ്റില്ലവും ലോകസംസ്കാരങ്ങളുടെ അമ്മയുമെന്നറിയപ്പെടുന്ന ഭാരതത്തിന്റെ ഇന്നത്തെ അവസ്ഥ വളരെ പരിതാപകരം തന്നെ. മൂല്യച്യുതി, നിയമ നിര്മാണം വഴി നേരിടേണ്ടി വരുന്നു എന്ന വസ്തുത, നമ്മുടെ മഹത്തായ ഒരു പാരമ്പര്യത്തിനു വന്നുഭവിച്ച അപചയത്തിന്റെ ശക്തമായ തെളിവാണല്ലോ.
വിരമിക്കുന്ന ഗുരുനാഥനു ചിതയൊരുക്കി പിണ്ഡം വയ്ക്കുന്ന വിദ്യാര്ഥി പ്രസ്ഥാനത്തിന്റെ നേതാക്കളും, തെരുവില് ഉമ്മസമരത്തിന് ആഹ്വാനം ചെയ്യുന്ന അഭിനവ സാംസ്കാരിക നായകന്മാരും, 'ഭാരത് തേരേ ടുക്കടെ ഹോങ്കേ' എന്നു മുദ്രാവാക്യം മുഴക്കുന്ന വിഘടനവാദികളും, ഭീകരര്ക്ക് സ്വന്തം ഭവനങ്ങളില് തന്നെ ഒളിത്താവളമൊരുക്കി ഒത്താശ ചെയ്തുകൊടുക്കുന്ന രാജ്യദ്രോഹികളും ഇതേ ദുരവസ്ഥയുടെ മാലിന്യവാഹകരായ വികട സന്തതികളാണ്, അതുകൊണ്ടുതന്നെ അങ്ങേയറ്റം നിന്ദനീയരും.
-- ശ്രീനിവാസന്
